నవరాత్రులు ఎంతో విశేషమైనవి. ఈ శ్యామలా దేవి తిరుగాడే నవరాత్రులలో అమ్మవారిని భక్తి శ్రద్ధలతో పూజిస్తే మంచి ఉద్యోగాలు, ఉన్నత పదవులు, విద్య, ఐశ్వర్యం లభిస్తాయి. అంతేకాక బార్య భర్తల మధ్య అన్యోన్యత, వివాహం కానివారికి త్వరగా వివాహాలు జరుగుతాయని శాస్త్రం చెబుతోంది.
ప్రతి ఏటా నాలుగు నవరాత్రులు వస్తాయి. చైత్ర మాసంలో వసంత నవరాత్రులు, ఆషాఢ మాసంలో వారాహి నవరాత్రులు, , అశ్వయుజ మాసంలో దుర్గా నవరాత్రులు, మాఘ మాసంలో శ్యామల నవరాత్రులు. వీటినే మాతంగి నవరాత్రులు అని కూడా అంటారు.
దక్షిణ భారత దేశంలో చైత్ర, అశ్వయిజ నవరాత్రులను అందరూ జరుపుకుంటారు. మిగిలిన రెండింటిని గుప్త నవరాత్రులు అంటారు. అంటే ఇవి కేవలము సంప్రదాయం ఉన్నవారు మాత్రమే చేసుకుంటారు. ఉత్తర భారతంలో మాత్రం ఈ గుప్త నవరాత్రులను ఎక్కువగా జరుపుకుంటారు. గుప్త నవరాత్రులు అంటే సాధారణ పూజలు, వ్రతాల మాదిరిగా అందరినీ పిలిచి చేయరు. వీటిని చాలా రహస్యంగా చేసుకుంటారు. గుప్త నవరాత్రులలో తొమ్మిదిరోజుల పాటు దుర్గాఅమ్మవారిని తొమ్మిది రూపాలలో అంటే నవదుర్గలుగా అలంకరించి పూజలు చేస్తారు.
శ్యామలాదేవి చరిత్ర
భండాసురుడు అనే రాక్షసుని చంపడానికి ఆదిపరాశక్తి శ్రీలలితా దేవి గా ఉద్భవించి బ్రహ్మాది దేవతలను మరలా నూతనంగా సృష్టించే క్రమంలో ఙ్ఞానం శ్యామలాదేవిని సృష్టించింది. పదహారు మంది మంత్రులలో ముఖ్యురాలైన ఆ శ్యామలాదేవిని ప్రధానమంత్రిగా నియమిస్తుంది. ఆ కారణం చేతనే శ్యామలాదేవిని మంత్రిణీ దేవి అని కూడా అంటారు.
శ్యామల అమ్మవారికి మాతంగి అనే పేరు ఎలా వచ్చింది?
హిమవంతుని స్నేహితుడైన మతంగముని తపస్సుకి సంతోషించిన శ్యామలాదేవి ఆయన కోరిక మేర మాతంగుడి కుమార్తెగా జన్మించి మాతంగిదేవిగా ప్రసిద్ధి చెందింది. ఈ తల్లికి నీల సరస్వతి, గేయ చక్ర వసిని, లఘు శ్యామల, వాగ్వాధిని శ్యామల, నకుల శ్యామల, హసంతి శ్యామల, సర్వసిద్ది మాతంగి, వాస్య మాతంగి, సారిక శ్యామల, శుక శ్యామల, రాజ మాతంగి అని ఎన్నో నామాలు ఉన్నాయి.
శ్యామలాదేవి పూజ ఎలాచేయాలి?
ఫిబ్రవరి 10, శనివారం నుంచి మాఘ మాసం ప్రారంభం అవుతుంది అలాగే శ్యామల నవరాత్రులు కూడా మొదలు అవుతున్నాయి. శ్యామల అమ్మవారి ఫోటో కానీ విగ్రహం కానీ ఉంటే కుంకుమ అర్చనలు చేసుకోవాలి. ప్రతిరోజూ శ్యామల దండకం,శ్యామల అష్టోత్తర శతనామావళి, శ్యామల దేవి స్తోత్రాలు పారాయణ చేసుకోవాలి. శ్యామల అమ్మవారు సరస్వతి దేవికి మరొక రూపం అందుకే ఈ 9 రోజులు మీ పిల్లలతో కూడా పూజ చేయించండి.శ్యామల దండకం చదివించండి.
