ప్రసిద్ధ వైష్ణవాలయం శ్రీ ఆదికేశవ ఎంబెరుమానార్ కోవెల

పశ్చిమగోదావరి జిల్లా నరసాపురంలోని శ్రీ ఆదికేశవ ఎంబెరుమానార్ కోవెల

ఆంధ్రప్రదేశ్ రాష్ర్టంలోని పశ్ఛిమ గోదావరి జిల్లాలోని ముఖ్య పట్టణం అయిన నరసాపురంలో ప్రసిద్ధి చెందిన దేవాలయము శ్రీ ఆదికేశవ ఎంబర్మన్నార్ కోవెల. ఇది భారతదేశ ప్రసిద్ధ వైష్ణవాలయాలలో ఒకటి. దీని నిర్మాణము నేటికి 231 సంవత్సరాలకు మునుపు జరిగింది.

దేశంలోని వైష్టవ క్షేత్రాలన్నింటిలో తమిళనాడు రాజధానికి చెన్నైకి సమీపంలోని శ్రీ పెరుంబుదూరులో ఉన్న శ్రీ ఆదికేశవ ఎంబెరుమన్నార్ స్వామివారి దేవాలయం చాలా ప్రశస్తమైనది.

ప్రసన్నాగ్రేసర పుప్పల రమణప్పనాయుడు అనే భక్తుడు తన గురువుగారైన ఈయుణ్ణి రామానుజా చార్యుల ఆదేశానుసారం, ఆయన కోరికను తీర్చే నిమిత్తం నరసాపురంలో కూడా శ్రీ ఆదికేశవ ఎంబర్ మన్నార్ ఈ ఆలయాన్ని కట్టించారని ఇక్కడి స్థలపురాణం చెబుతోంది.

పశ్చిమగోదావరి జిల్లా నరసాపురంలోని శ్రీ ఆదికేశవ ఎంబెరుమానార్ కోవెల

ఈ ఆలయ నిర్మాణ శైలి తమిళనాడు లోని పెరంబుదూర్ లోని వైష్ణవదేవాలయమును పోలి ఉంటుంది. ఇక్కడి ఆలయంలో కూడా పెరుంబుదూరు ఆలయ సాంప్రదాయాలను నేటికీ పాటిస్తూ వస్తున్నారు. ఈ ఆలయంలోని రామానుజులవారి విగ్రహం వారు జీవించి ఉన్నకాలంలోనే ఏర్పాటు చేసినట్టు ఆలయ చరిత్ర ప్రకారం తెలుస్తోంది.

ప్రతి సంవత్సరం ఇక్కడ జరిగే ఆదికేశవ స్వామి బ్రహ్మోత్సవాలకు, రామానుజాచార్యుల తిరునక్షత్ర ఉత్సవానికి దేశంలోని వివిధ ప్రాంతాలనుండి చాలామంది వైష్ణవ గురువులు, భక్తులు తరలి వస్తారు. మీరు కూడా ఈ ఆలయాన్ని దర్శించి ఆదికేశవుల అనుగ్రహానికి పాత్రులవుతారు కదూ...

పశ్చిమగోదావరి జిల్లా నరసాపురంలోని శ్రీ ఆదికేశవ ఎంబెరుమానార్ కోవెలలో ఆళ్వారుల విగ్రహాలు

నరసాపురం వెళ్లాలంటే విజయవాడ నుండి రైలు, బస్సు సదుపాయం ఉంది. అలాగే ఏలూరు నుంచి ఎక్కువగా నరసాపురం బస్సులు తిరుగుతాయి. కాకినాడ, రాజమండ్రి నగరాలనుంచి కూడా విరివిగా బస్సులు తిరుగుతాయి. జాతీయ రహదారిలో ఉండే తూర్పుగోదావరి జిల్లా రావులపాలెం నుంచి ప్రతి 30 నిముషాలకు ఒక బస్సు ఉంటుంది.

స్థానికంగా ఈ ఆలయం కోవెల గుడిగా పేరుపొందింది. శ్రీ ఆదికేశవ ఎంబర్మన్నార్ కోవెలగా పేర్కొంటారు. ఇక్కడ కొలువై ఉన్న కేశవుడు భక్తలు కోరిన కోర్కెలు తీరుస్తాడని... జీవితంలోని భయాలు... బాధలు పటాపంచలు చేస్తాడని ప్రజల నమ్మకం.